Indiagroundreport वार्ताहर
पिंपरी-चिंचवड : पिंपरी-चिंचवड महापालिकेतील(Pimpri-Chinchwad Municipal Corporation) नोकरभरती आणि पालिका अधिकाऱ्यांना देण्यात आलेल्या पदोन्नतीत कोणत्याही प्रकारे गैरप्रकार झाले नसून, याबाबतची सर्व कार्यवाही नियमानुसारच झाली असल्याचा दावा पिंपरी-चिंचवड महापालिकेने केला आहे. पालिकेतील अनेक कामांमध्ये गैरप्रकार झाल्याची तक्रार सामाजिक कार्यकर्ते मारूती भापकर यांनी काही दिवसांपूर्वी मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्याकडे पत्राद्वारे केली होती. त्याचा संदर्भ देऊन महापालिकेच्या प्रशासन विभागाने भापकर यांना लेखी पत्र पाठविले आहे.
पिंपरी-चिंचवड महापालिकेच्या नोकरभरतीसाठी खासगी कंपनीकडून परीक्षांचे कामकाज करून घेतले जाते. त्यादृष्टीने महापालिकेने कंपनीशी करारनामा(agreement) केला आहे. याबाबतच्या खर्चास मंजुरी देण्यात आली आहे. नोकरभरतीत कोणत्याही प्रकारे नियमबाह्य कार्यवाही करण्यात आलेली नाही. त्याचप्रमाणे अधिकाऱ्यांना पदोन्नती देण्याच्या प्रकरणातही महापालिका अधिनियमानुसार सर्व नियमांचे, निकषांचे पालन करण्यात आले असल्याचे महापालिकेने दिलेल्या पत्रात म्हटले आहे.
