मतमोजणीच्या होणार 19 फेऱ्या
दीपक कैतके
मुंबई : अंधेरी पूर्व विधानसभा मतदारसंघाच्या पोटनिवडणुकीची रविवारी, 6 नोव्हेंबर रोजी मतमोजणी होऊन निकाल जाहीर होणार आहे. गुंदवली(Gundvali) येथील महापालिका शाळेत सकाळी आठ वाजल्यापासून मतमोजणीला सुरुवात होईल. निवडणूक अधिकाऱ्यांनी मतमोजणीची तयारी पूर्ण केली आहे.
शिवसेना आमदार रमेश लटके यांच्या निधनाने रिक्त झालेल्या अंधेरी पूर्व विधानसभा मतदारसंघासाठी(assembly constituency) ३ नोव्हेंबरला पोटनिवडणूक घेण्यात आली होती. या पोटनिवडणुकीत जेमतेम ३१ टक्के मतदान झाले. शिवसेना(उद्धव बाळासाहेब ठाकरे) पक्षप्रमुख उद्धव ठाकरे गटाच्या ऋतुजा लटके यांच्यासह सात उमेदवार निवडणूक रिंगणात आहेत. या निवडणुकीत ऋतुजा लटके यांच्या विरोधात नोटाचा प्रचार करण्यात आल्याचा आरोप शिवसेनेकडून करण्यात आला आहे. त्यामुळे शिवसेनेची ओळख राहिलेल्या धनुष्यबाण चिन्हाऐवजी मशाल या चिन्हावर लढणाऱ्या ऋतुजा लटके यांना पोटनिवडणुकीत मतदारांनी कसा प्रतिसाद दिला, याविषयी ठाकरे गटात उत्सुकता आहे.
दरम्यान, सकाळी आठ वाजता टपाली मतपत्रिकांच्या गणनेने मतमोजणीस प्रारंभ होईल, त्यानंतर अर्ध्या तासाने म्हणजेच साडेआठ वाजता ‘ईव्हीएम'(‘EVM’) यंत्रातील मतांच्या मोजणीला सुरुवात केली जाईल. ‘ईव्हीएम’ आधारित मतमोजणीसाठी १४ टेबल असणार आहेत. मतमोजणीच्या एकूण १९ फेऱ्या होणार असून, प्रत्येक फेरीअंती मतगणनेची माहिती ध्वनिक्षेपकाद्वारे आणि मतमोजणी केंद्राच्या बाहेर लावण्यात आलेल्या ‘एलसीडी स्क्रीन’वर दाखविण्यात येणार असल्याची माहिती निवडणूक निर्णय अधिकारी प्रशांत पाटील यांनी दिली.
या मतमोजणीसाठी(counting of votes) २०० अधिकारी आणि कर्मचारी कार्यरत असतील. यामध्ये मुंबई उपनगर जिल्हा प्रशासन, राज्य शासनाची विविध खाती, मुंबई महानगरपालिका, म्हाडा, महावितरण, प्रादेशिक परिवहन कार्यालय, मुंबई मेट्रो, मुंबई महानगर प्रदेश विकास प्राधिकरण यासारख्या विविध संस्थांच्या अखत्यारीतील अधिकारी आणि कर्मचाऱ्यांचा समावेश आहे. त्याचबरोबर कायदा आणि सुव्यवस्थेसाठी मुंबई पोलीसदलाचे ३०० अधिकारी, कर्मचारी आणि इतर सुरक्षा यंत्रणाही कर्तव्यावर तैनात असणार आहेत, असे प्रशांत पाटील(Prashant Patil) यांनी सांगितले.