New Delhi: द्रौपदी मुर्मू राष्ट्रपतीपदाची शान आणखी वृद्धिंगत करतील: एकनाथ शिंदे
Indiagroundreport वार्ताहर
नवी दिल्ली: (new delhi) द्रौपदी मुर्मू(Draupadi Murmu) यांनी आज देशाच्या १५व्या राष्ट्रपती म्हणून शपथ घेतली, या समारंभास राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीसही उपस्थित होते. द्रौपदी मुर्मू यांनी आज शपथ घेतली आणि भारताच्या १५व्या राष्ट्रपती म्हणून त्या पदावर विराजमान झाल्या. यासाठी त्यांचे अभिनंदन करून मुख्यमंत्री एकनाथ शिंदे यांनी त्यांच्या कारकिर्दीला शुभेच्छा दिल्या.
मुख्यमंत्री एकनाथ शिंदे(Eknath Shinde) म्हणाले की, भारतीय स्वातंत्र्याच्या अमृत महोत्सवी वर्षात राष्ट्रपतीपदावर विराजमान झालेल्या द्रौपदी मुर्मू यापदाची शान आणखी वृद्धिंगत करतील. त्यांच्यामुळे भारताचा गौरव जागतिक स्तरावर आणखी उंचावेल, असा सार्थ विश्वास आहे. त्यांच्या कारकिर्दीला आदरपूर्वक शुभेच्छा.
दरम्यान, संसदेच्या सेंट्रल हॉलमध्ये आज नवनियुक्त राष्ट्रपती द्रौपदी मुर्मू यांच्या शपथग्रहण समारंभाचे(swearing-in ceremony) आयोजन करण्यात आले. सर्वोच्च न्यायालयाचे सरन्यायाधीश एन. व्ही. रमन्ना यांनी राष्ट्रपती महोदयांना पद व गोपनीयतेची शपथ दिली. या समारंभास माजी राष्ट्रपती रामनाथ कोविंद, उपराष्ट्रपती तथा राज्यसभेचे सभापती एम. व्यंकय्या नायडू, लोकसभा अध्यक्ष ओम बिर्ला, प्रधानमंत्री नरेंद्र मोदी यांच्यासह केंद्रीयमंत्री व राज्यांचे मुख्यमंत्री, उपमुख्यमंत्री आदी मान्यवर उपस्थित होते.
