Mumbai: राज ठाकरेंनी ‘त्या’ ट्वीटवरून केतकी चितळेला सुनाविले
Indiagroundreport वार्ताहर
मुंबई : (mumbai) शरद पवारांवर सातत्याने टीका करणाऱ्या राज ठाकरेंनी(Raj Thackeray) देखील केतकी चितळेला सुनाविले आहे. यासाठी राज ठाकरेंनी ट्विटरवर खुलं पत्रच पोस्ट केले आहे. राष्ट्रवादी काँग्रेसचे अध्यक्ष शरद पवार यांना उद्देशून करण्यात आलेल्या एका ट्वीटमुळे सध्या राज्याच्या राजकारणात सर्वपक्षीय नेतेमंडळींकडून नाराजीचा सूर व्यक्त करण्यात येत आहे. अभिनेत्री केतकी चितळे हिने तिच्या सोशल मीडिया अकाऊंटवरून श्लोक प्रकारातून पोस्ट केलेल्या ओळींमधून शरद पवारांवर खालच्या स्तरावर जाऊन टीका केली आहे. यासंदर्भात राष्ट्रवादीच्या अनेक नेत्यांनी देखील तीव्र संताप व्यक्त केलेला असताना केतकी चितळेविरुद्ध गुन्हा देखील दाखल झाला आहे.
राज ठाकरेंनी आपल्या पत्रामध्ये केतकी चितळेच्या(Ketki Chitale) पोस्टवर तीव्र नाराजी व्यक्त केली आहे. कुणीतरी केतकी चितळे नामक व्यक्तीने अतिशय खालच्या पातळीवर जाऊन घाणेरड्या शब्दांत काहीतरी श्लोकासारखे लिहून फेसबूकवर पोस्ट प्रकाशित केलेली आमच्या निदर्शनास आणली गेली. खाली काहीतरी भावे वगैरे असे नाव टाकले आहे. या लिखाणाला महाराष्ट्र संस्कृतीत जागा नाही. त्याचा आम्ही तीव्र शब्दांत निषेध करतो, असे आपल्या पत्रात राज ठाकरेंनी ठणकाविले आहे.
शरद पवारांवर(Sharad Pawar) असे लिखाण साफ गैर असल्याचे राज ठाकरे म्हणाले आहेत. महाराष्ट्राच्या राजकारणात बरीच वर्ष कार्यरत असलेल्या शरद पवारांविरुद्ध तिने किंवा त्या भावेने हे लिहिणे साफ गैर आहे. विचारांचा मुकाबला विचारांनी करायचा असतो. एखादा हलका विनोद वगैरे आपण समजू शकतो. त्यातली विनोदबुद्धीही आपण ओळखतो. तशा टीका महाराष्ट्राला नव्या नाहीत! आमचे त्यांच्यासोबत मतभेद जरूर आहेत आणि राहतील, पण अशा घाणेरड्या पातळीवर येणे साफ चूक आहे. ही महाराष्ट्राची संस्कृती नाही. असे लिहिणे ही एक प्रवृत्ती नव्हे, तर मानसिक विकृती आहे. तिला वेळीच आवर घालायला हवा, असे या पत्रात राज ठाकरेंनी नमूद केले आहे.
चांगल्याला चांगले आणि वाईटाला वाईट म्हणणे हेच आजपर्यंत आपल्या महाराष्ट्रातल्या महापुरुषांनी, संतांनी तसेच असंख्य बुद्धीमान विचारवंतांनी आपल्याला शिकविले. कुणीही या राज्याची परंपरा खालच्या पातळीवर नेऊ नये ही अपेक्षा, असे देखील या पत्रात राज ठाकरे म्हणाले आहेत.
पोस्ट लिहिणाऱ्या व्यक्ती या खरंच आहेत की नवा वाद उकरून काढण्यासाठी कुणाची तरी उठाठेव सुरू आहे हे देखील तपासणे गरजेचे आहे! कारण या अशाच चार-दोन विकृत टाळक्यांमुळे समाजा-समाजामध्ये तेढ निर्माण होते. समाज दुभंगतो. द्वेषाची पातळी किती खालपर्यंत आली आहे हे आता राज्यकर्त्यांनाही समजले असेलच. हे सगळ महाराष्ट्रात(Maharashtra) वेळीच आवरणे गरजेचे आहे, कारण महाराष्ट्राची ओळख वेगली आहे. म्हणूनच राज्यसरकारने याचा नीट छडा लावून या गोष्टींचा ताबडतोब बंदोबस्त करावा, अशी मागणी राज ठाकरेंनी राज्य सरकारकडे केली आहे.
