Mumbai : आमदार रमेश लटके यांचे हृदयविकाराच्या झटक्याने दुबईत निधन
राजा आदाटे
मुंबई : (Mumbai) अंधेरी पूर्वचे शिवसेनेचे आमदार रमेश लटके (Andheri East Shiv Sena MLA Ramesh Latke) यांचे हृदयविकाराच्या झटक्याने दुबई येथे निधन झाले. वयाच्या 52व्या वर्षी त्यांनी अखेरचा श्‍वास घेतला. दुबईत ते कुटुंबीयांसह फिरायला गेले होते. दुबईत खरेदीसाठी बाहेर गेले असताना रमेश लटके यांना हृदयविकाराचा झटका आल्याची माहिती त्यांच्या कुटुंबियांकडून मिळाली आहे.
तीनवेळा नगरसेवक
रमेश लटके हे 1997 साली मुंबई महानगरपालिकेत पहिल्यांदा शिवसेनेचे नगरसेवक म्हणून निवडून गेले. त्यानंतरच्या सन 2002 आणि 2009 च्या महापालिका निवडणुकीत विजयी होत ते महापालिकेत नगरसेवक म्हणून गेले, तर 2014 च्या विधानसभा निवडणुकीत त्यांनी विधानसभेच आमदार म्हणून विजय मिळविला. त्यानंतर पुढच्याच 2019 च्या विधानसभेच्या निवडणुकीत अंधेरी पूर्वच्या मतदारांनी त्यांच्यावर विश्‍वास दाखवित त्यांना पुन्हा निवडून दिले. रमेश लटके यांच्या निधनाचे वृत्त कळताच स्थानिकांनी त्यांच्या कार्यालयाबाहेर एकच गर्दी केली.
गणेश मंडळाचे अध्यक्ष ते आमदार
आमदार रमेश लटके यांनी तीन दिवसापूर्वी अंधेरी पूर्वेत होली फॅमिली ग्राउंडमध्ये सत्कार समारंभ कार्यक्रम ठेवला होता. त्या कार्यक्रमात मंत्री अनिल परब व मंत्री एकनाथ शिंदे उपस्थित होते. त्यानंतर ते काल पहिल्यांदाच दुबईला आपल्या सहकुटुंबियांसोबत फिरायला गेले होते. रमेश लटके यांनी सार्वजनिक गणेश मंडळाच्या अध्यक्षपदापासून आपल्या कारकिर्दीची सुरुवात केली. गटप्रमुख ते आमदार असा त्यांचा अफलातून राजकीय प्रवास होता. या प्रवासादरम्यान त्यांनी शाखाप्रमुख, नगरसेवक ही आणि अशी विविध पद यशस्वीरित्या भूषविली. त्यांचा दांडगा जनसंपर्क होता.
