Mumbai: सगळं ठरलंय.. फडणवीस मुख्यमंत्री आणि शिंदे उपमुख्यमंत्री !
बंडखोर आमदार शहाजी बापू पाटील यांची क्लिप व्हायरल
प्रशांत बारसिंग
मुंबई: (Mumbai) आमचं सगळं ठरलंय… देवेंद्र फडणवीस(Devendra Fadnavis) मुख्यमंत्री आणि एकनाथ शिंदे उपमुख्यमंत्री होणार, अशी सांगोल्याचे बंडखोर आमदार शहाजी बापू पाटील यांची क्लिप व्हायरल झाल्याने खळबळ उडाली आहे.शिवसेना नेते आणि नगरविकास मंत्री एकनाथ शिंदे(Eknath Shinde) यांच्या बंडामुळे राज्यातील महाविकास सरकार संकटात सापडले आहे. जवळपास 7 मंत्र्यांसह 40 आमदारांनी बंड केले आहे. गटनेतेपदी आपणच आहोत हे सांगण्यासाठी शिंदे गटाकडून विधिमंडळात प्रस्ताव देखील पाठवण्यात आला आहे. याच घडामोडींच्या पार्श्वभूमीवर शिवसेनेचे सांगोला तालुक्याचे बंडखोर आमदार शहाजी पाटील यांची एक ऑडिओ क्लिप व्हायरल झाली आहे.
यामध्ये त्यांनी सगळं ठरलंय, देवेंद्र फडणवीस मुख्यमंत्री तर एकनाथ शिंदे उपमुख्यमंत्री होणार असल्याचे त्यांनी आपल्या कार्यकर्त्याला सांगितले. रफीक शेख असे या कार्यकर्त्याचं नाव आहे. शहाजी पाटील यांच्या एका कार्यकर्त्याने त्यांना फोन करुन आपण कुठे असल्याची विचारणा केली. यावेळी शहाजी पाटील म्हणाले की, मी गुवाहटीत आहे. इकडं काय झाडी, काय डोंगार, काय हॉटेल, सगळं ओके आहे. कोणाला फोन करु नका, असा नेत्यांचा आदेश होता. त्यामुळं कुणाला फोन केला नाही, असे त्यांनी कार्यकर्त्याला सांगितले.
हा माणूस बोलत नाही पण रिझल्ट देतो
एकनाथ शिंदे जास्त बोलत नाहीत पण त्यांचे रिझल्ट करेक्ट आहेत. मला हे नेतृत्व खूप आवडले आहे. आपली ओळख नाही पाळख नाही तरीपण त्यांनी माझी विचारपूस केल्याचे शहाजी पाटील यांनी सांगितले. तुम्ही गणपतराव देशमुख यांच्या मतदारसंघातून निवडून आले आहेत, तुम्ही काही पण काम सांगा असे शिंदे म्हणाल्याचे पाटील यांनी सांगितले.
उद्धव ठाकरे देव माणूस
एकही आमदार उद्धव साहेबांच्या विरोधात नाही. त्यांना देव माणूस मानत आहेत, असेही सांगायला शहाजी पाटील विसरले नाहीत. पुढच्या अडीच वर्षात तालुक्याचा ऐतिहासीक विकास होणार आहे. तुम्ही बघत राहा फक्त. पण हे सांगत असताना गेल्या अडीच वर्षातमध्ये सांगोला उपसा सिंचन योजनेला नाव आपण हिंदुहृदयसम्राट बाळासाहेब ठाकरे यांचे नाव द्या, अशा मागणीची बारा पत्र उध्दव ठाकरे यांना दिली असतानाही त्यांनी नाव दिले नसल्याची तीव्र नाराजी शहाजी पाटील यांनी व्यक्त केली. त्यामुळे एकीकडे उद्धव ठाकरे यांचे कोडकौतुक सांगोल्याचे आमदार करीत असले तरी दुसरीकडे मात्र त्यांच्या मनात मतदारसंघाच्या निमित्ताने एक प्रकारची नाराजी पक्षनेतृत्वावर दिसून येत आहे.
प्रथम शंभूराज देसाई आणि मी दोघेच गेलो
सांगोल्याचे दिवंगत माजी आमदार गणपतराव देशमुख(Ganapatrao Deshmukh) यांच्या निधनानंतर आपणास सभागृहात बोलू दिले नाही, याबाबतची नाराजीही शिवसेनेबद्दल यावेळी शहाजी पाटील यांनी व्यक्त केली. आपण योग्य निर्णय घेतला आहे. एकनाथ शिंदे यांच्या गटांमध्ये शंभूराज देसाई आणि मी आम्ही दोघे पहिल्यांदा गेलो मग बाकीचे आमदार आले असाही खुलासाही यावेळी पाटील यांनी केला. तसेच तीन दिवस झाले आपण गुवाहाटीमध्ये आहे. त्यामुळे तालुक्यात काय घडते आहे, यासाठी तुम्हाला फोन केला असल्याची कबुलीही यावेळी पाटील यांनी दिली. शाहाजी आपू पाटील(Shahaji Apu Patil) यांचे हे कॉल रेकॉर्डिंग प्रचंड व्हायरल होत आहे.
