Maharashtra : कुठे शिष्यवृत्तीचे 1058 अर्ज महाविद्यालयांकडे प्रलंबित?

अर्ज निकाली काढण्याचे समाज कल्याण विभागाचे आवाहन

Indiagroundreport वार्ताहर
बुलडाणा : सामाजिक न्याय व विशेष सहाय्य, तसेच बहुजन कल्याण, इतर मागास विभागामार्फत प्रत्येकवर्षी अनुसूचित जाती, विमुक्त जाती, भटक्या जमाती, इतर मागास व विशेष मागास प्रवर्गातील मॅट्रिकोत्तर शिक्षण घेत असलेल्या विद्यार्थ्यांना भारत सरकार शिष्यवृत्ती आणि राज्य शासनाची शिक्षण, परीक्षा शुल्क या योजनांचा लाभ देण्यात येतो. सदर योजने अंतर्गत महाडीबीटी प्रणालीवर विद्यार्थ्यांनी ऑनलाईन केलेले अर्ज महाविद्यालय स्तरावर पाठविले जातात. महाविद्यालयाने त्यांच्या स्तरावर प्राप्त अर्जांची तपासणी करून शिष्यवृत्तीकरिता(scholarship) पात्र अर्ज या कार्यालयास पाठविणे आवश्यक आहे. तसेच त्रृटी असलेले अर्ज विद्यार्थ्यांच्या लॉगीनला परत करणे आवश्यक आहे. मात्र, वारंवार सूचना देवूनही बुलडाणा जिल्हयातील 1058 विद्यार्थ्यांचे अर्ज महाविद्यालय स्तरावरच प्रलंबित आहेत.

त्यानुसार प्रलंबित अर्ज(pending applications) असलेल्या महाविद्यालयांनी अनु. जाती प्रवर्गाच्या विद्यार्थ्यांचे महाविद्यालय स्तरावर प्रलंबित असलेले अर्ज तपासणी करून पात्र अर्ज सहाय्यक आयुक्त, समाज कल्याण बुलडाणा यांच्या लॉगीनला तात्काळ पाठविण्यात यावे व त्रुटी असलेले अर्ज त्रुटींची पूर्ततेकरिता विद्यार्थी लॉगीनला परत करावे, अन्यथा मागासवर्गीय विद्यार्थ्याला शिष्यवृत्तीपासून वंचित ठेवल्याप्रकरणी नियमानुसार कार्यवाही करण्यात येईल. तरी जिल्हयातील सर्व कनिष्ठ व वरिष्ठ महाविद्यालयांनी आपल्या महाविद्यालयातील मागासवर्गीय विदयार्थी शिष्यवृत्ती लाभापासून वंचित राहणार नाही याची दक्षता घेण्याची जबाबदारी प्राचार्य यांची राहील, याची नोंद घ्यावी.

महाविद्यालयांनी(colleges) त्यांच्या स्तरावरील प्रलंबित अर्जसंख्या तात्काळ निकाली काढण्याचे आवाहन डॉ. अनिता राठोड, सहाय्यक आयुक्त समाज कल्याण, बुलडाणा यांनी केले आहे.