Bhiwandi: पिस्तूलचा धाक दाखवून पेट्रोल पंप वरील कर्मचाऱ्यांना लुटले; घटना सीसीटीव्हीत कैद

शरिफ अन्सारी
भिवंडी: (Bhiwandi) भिवंडी तालुक्यातील पडघा(Padgha) भागात असलेल्या एका पेट्रोल पंपावर काही अनोळखी लुटारूंनी पिस्तूल सारखे दिसणारे हत्यार दाखवून कर्मचाऱ्यांकडे असलेल्या पैश्यांची बॅग आणि मोबाईल चोरून पसार झाल्याची घटना घडली आहे. याप्रकरणी पडघा पोलीस ठाण्यात गुन्हा दाखल करत पोलीसांनी अधिक तपास सुरू केला आहे. मात्र पोलिसांच्या नोंदीत पिस्तूल ऐवजी लोखंडी पाईपा सारख्या वस्तु असे उल्लेख केल्याने आश्चर्य व्यक्त केले जात आहे ? हा लुटीचा सर्व प्रकार सीसीटीव्हीत कैद झाला आहे.

पोलिसांनी दिलेल्या माहितीनुसार मुंबई – नाशिक मार्गावर पडघा गावा नजीक डोहळे येथील जाई पेट्रोल पंप आहे. 7 मे रोजी दुपारी 3 वाजेच्या सुमारास एक सिल्व्हर रंगाची ऍक्टिवा मोटरसायकल वरून तीन अनोळखी लुटारु तोंडाला कपडा बांधून आले. त्यावेळी पेट्रोल पंपच्या पॉईंटवर कार्यरत कर्मचाऱ्यांना बंदूक सारखी दिसणारी वस्तु दाखवून जीवे ठार मारण्याची धमकी दिली. सर्व कर्मचारी घाबरले, तसेच एका कर्मचाऱ्याकडे असलेल्या पैश्यांची बॅग जबरदस्तीने हिसकावून घेतली. लुटारू व कर्मचाऱ्यांमध्ये झटापट झाली,त्यावेळी इतर कर्मचारीही मदतीसाठी धावून आले.

त्यांनाही बंदूक सारखी दिसणारी वस्तु दाखवून त्यांच्याकडे असलेली पैश्यांची बॅग आणि मोबाईल घेऊन चोरटे पडघ्याच्या दिशेने पसार झाले. विशेष बाब म्हणजे सिल्व्हर रंगाची मोटरसायकल बिना नंबर प्लेटची होती. याबाबत फिर्यादी रामदास दत्तू जाधव यांच्या तक्रारी नुसार पडघा पोलीस ठाण्यात कलम 392, 34 अन्वये गुन्हा दाखल झाला असून पोलीस या घटनेचा अधिक तपास करत आहेत.